ຂປລ. ຊຸດສຳມະນາຍົກສູງຄຸນນະພາບດ້ານເນື້ອໃນ ກະກຽມໃຫ້ແກ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VII ໄດ້ຈັດຂຶ້ນ ແຕ່ວັນທີ 16-19 ມິຖຸນາ 2014 ທີ່ ສູນການຮ່ວມມືສາກົນ ແລະ ຝຶກອົບຮົມ (ICTC) ໂດຍການເປັນປະທານຂອງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ມີທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະກິດ, ພ້ອມຄະນະປະຈຳສະພາແຫ່ງຊາດ, ລັດຖະມົນຕີວ່າການ, ຊ່ວຍວ່າການ ແລະ ບັນດາວິທະຍາກອນທັງພາຍໃນ ແລະ ຕ່າງປະເທດ ເຂົ້າຮ່ວມ.
ສຳມະນາໃນຄັ້ງນີ້ ຈະໄດ້ຮັບຟັງການນຳສະເໜີຫົວຂໍ້ຕ່າງໆ ຈາກກະຊວງທີ່ກ່ຽວຂ້ອງ ແລະ ຊ່ຽວຊານທັງພາຍໃນ ແລະ ຕ່າງປະເທດ ໄປພ້ອມກັບ ການປະກອບຄຳຄິດຄຳເຫັນຢ່າງມີຈຸດສຸມຂອງບັນດາກຳມາທິການທີ່ກ່ຽວຂ້ອງຂອງສະພາແຫ່ງຊາດ ແລະ ບັນດາຜູ້ແທນທີ່ເຂົ້າຮ່ວມ ຊຶ່ງຈະໄດ້ສຸມໃສ່ ບາງບັນຫາທີ່ສຳຄັນ ເປັນຕົ້ນ ຮັບຟັງການລາຍງານກ່ຽວກັບການຈັດຕັ້ງປະຕິບັດບັນດາຕົວເລກຄາດໝາຍໃນແຜນພັດທະນາເສດຖະກິດ-ສັງຄົມ ແລະ ແຜນງົບປະມານ 6 ເດືອນຕົ້ນສົກປີ ແລະ 6 ເດືອນທ້າຍສົກປີ 2013-2014 ລວມທັງການດັດແກ້ແຜນງົບປະມານແຫ່ງລັດ 6 ເດືອນທ້າຍປີ 2013-2014 ແລະ ແຜນການສົກປີ 2014-2015, ຮັບຟັງການສະເໜີບາງເນື້ອໃນສຳຄັນທີ່ຈະປັບປຸງ ແລະ ສ້າງໃໝ່ຂອງກົດໝາຍຈຳນວນ 5 ສະບັບຄື: ກົດໝາຍສ້າງໃໝ່ 2 ສະບັບ: ກົດໝາຍວ່າດ້ວຍການກວດສອບເອກະລາດ ແລະ ກົດໝາຍວ່າດ້ວຍການສະກັດກັ້ນ ແລະ ຕ້ານການຟອກເງິນ, ການສະໜອງເງິນໃຫ້ແກ່ການກໍ່ການຮ້າຍ; ກົດໝາຍປັບປຸງ 3 ສະບັບຄື: ກົດໝາຍວ່າດ້ວຍອາກອນມູນຄ່າເພີ່ມ, ກົດໝາຍວ່າດ້ວຍມາດຕະຖານ ແລະ ກົດໝາຍວ່າດ້ວຍການແກ້ໄຂຄຳຮ້ອງທຸກ ແລະ ຮັບຟັງການລາຍງານສະພາບພົ້ນເດັ່ນຂອງພາກພື້ນ ແລະ ສາກົນ.
ໂອກາດດັ່ງກ່າວ, ທ່ານ ນາງ ປານີ ຢາທໍ່ຕູ້ ກ່າວວ່າ: ການຈັດຊຸດສຳມະນາຄັ້ງນີ້ ເພື່ອປຶກສາຫາລື ແລະ ແລກປ່ຽນຄວາມຄິດເຫັນຕໍ່ບາງເນື້ອໃນ ທີ່ສຳຄັນຂອງຊາດ ຊຶ່ງຈະໄດ້ນຳເຂົ້າພິຈາລະນາ ແລະ ຮັບຮອງເອົາໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VII ຊຶ່ງຈະ ໄດ້ໄຂຂຶ້ນໃນຕົ້ນເດືອນກໍລະກົດ ທີ່ຈະມາເຖິງນີ້ ເພື່ອແນໃສ່ຮັບປະກັນຄວາມເຂົ້າໃຈ, ຄວາມເປັນເອກະພາບທາງດ້ານທັດສະນະ, ບັນດາຕົວເລກຄາດ ໝາຍໃຫຍ່, ທິດທາງ, ນະໂຍບາຍ ແລະ ມາດຕະການຈຳນວນໜຶ່ງ ລວມທັງຄວາມເຂົ້າໃຈທາງດ້ານວິຊາການ; ຮັບປະກັນການຕົກລົງບັນຫາສຳຄັນ ຂອງສະພາແຫ່ງຊາດໃຫ້ຖືກຕ້ອງ ແລະ ສອດຄ່ອງກັບມະຕິ IX ຂອງພັກ ກໍຄືບັນດາມະຕິຕ່າງໆຂອງຄະນະບໍລິຫານງານສູນກາງພັກ ໃນການປົກປັກ ຮັກສາ ແລະ ສ້າງສາພັດທະນາປະເທດຊາດໃນໄລຍະໃໝ່, ສ້າງບາດກ້າວຫັນປ່ຽນໃໝ່ດ້ວຍຈິດໃຈບຸກທະລຸໃນການສືບຕໍ່ຍູ້ແຮງການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານ 6 ເດືອນທ້າຍສົກປີ 2013-2014 ແລະ ແຜນການສົກປີ 2014-2015 ດ້ວຍຜົນສຳ ເລັດໃໝ່ໃຫຍ່ຫລວງກວ່າເກົ່າ./.
0 comments:
Post a Comment